“Алтын парҙар” кисә

“50 йыл -ул тотош ғүмер”- тиҙәр юбиляр ғаиләләр үҙҙәренең тормош юлына әйләнеп ҡарап. Ошо көндәрҙә Байым мәҙәниәт йортонда 50 йыл бергә ғүмер иткән ғаиләләрҙе тәбрикләү тантанаһы үтте. Байым биләмәһенең матур ғаиләләре: Рәшиҙә һәм Фәһим Рахмановтар, Рәшиҙә һәм Харис Рамазановтар, Гөлшат һәм Батыр Зәйтүновтар, Ғәшүрә һәм Урал Йортомбаевтар, Нәзирә һәм Раил Габдуллиндар алтын ғаилә юбилейҙарын билдәләйҙәр. Туғандары, балалары, ейән-ейәнсәрҙәре байрам ҡыуанысын бүлешергә килделәр. Парҙарға ҡарап һоҡланырлыҡ шул – тормошҡа һөйөү аша ҡарап, балалар ҡыуанысында гөрләшеп йәшәйҙәр. Юбиляр ғаиләләр барыһы ла хаҡлы ялға сыҡҡансы эшләп, матур донъя көтәләр. Кисәне мәҙәниәт хеҙмәткәрҙәре музыкаль яҡтан биҙәп, байрам кәйефен күтәрҙе. Алтын парҙар үҙҙәре лә музыкаль күстәнәс менән сығыш яһанылар. Алтын парҙарҙы ветерандар Советы рәйесе Хәйҙәр Хөснуллин, ауыл ветерандар советы рәйесәһе Мәҙинә Ғәскәрова, Рәүиә Ғәлекәйева тәбрикләне. Байым ауылы биләмәһе эштәре менән идара итеүсе Ленара Хуснитдинова юбиляр парҙарға Республика башлығының бүләген тапшырҙы.
“Ерҙә йәшәү – һынау бит ул тейҙәр,
Ауырлыҡты бергә еңдегеҙ ,
Тормош һуҡмағынан бергә атлап,
Алтын туйығыҙға еттегеҙ!
Тағын бик күп йылдар тигеҙлектә
Матур парҙар булып йәшәгеҙ.
Сәләмәтлек һәр саҡ юлдаш булһын ,
Балҡып торһон тормош сәскәгеҙ!” – тигән матур шиғри юлдар менән алтын парҙарға бәхетле парлы ғүмер теләйбеҙ.