Концерт “Душою молоды всегда”

Оло йәштәгеләр көнө бөгөн,

Ҡарттар көнө тиҙәр, халыҡта.

Хаҡлы ялға сыҡҡан һәр бер кеше-

Бөтәбеҙ ҙә бер үк ҡалыпта!

Йылдар үтә, тиеп борсолмағыҙ-

Йылдар үтеү-бер ни түгел ул.

Һау-сәләмәт булып, оҙаҡ йәшәү-

Үҙе бәхет, үҙе шатлыҡ ул!

Ололар байрамына арналған тамашала “Күбәләк биҙәктәре” фольклор ансамбле, сәнғәт мәктәбенең “Тамсылар”, “Шатлыҡ” балалар бейеү ансамбле, Сәмиға Әхмәтова дәртле бейеүҙәре менән сығыш яһаны. Ғәйәр Валеев (мандолина),  Ирес Илһамов (баян) башҡарыуында дәртле башҡорт көйҙәре теҙмәһенә залда ултырған тамашасылар бейергә төштөләр хатта. Йыр-моңо менән Миләүшә Махиянова йәшлеккә алып ҡайтты. Зилә Толонғужина уҡыусылары менән шиғыр аша байрам кәйефе бүләк иттеләр. Ҡотлау һүҙҙәрен Байым биләмәһе башлығы Даян Фәтхуллин, ҡатын-ҡыҙҙар советы рәйесәһе Гөлсинә Әғзәмова, ветерандар советы рәйесе Хәйҙәр Хөснуллин, Мәҙинә Ғәскәрова, Рәүиә Ғәлекәйева еткерҙе. Алтын көҙҙөң сыуаҡ көнөндә оло йәштәге инәй-апалар бер-береһен күреп, аралашып ҡайтыуҙары күңелдәрҙә йылы хистәр уятып, байрам кәйефе өҫтәне. Барыһына ла һаулыҡ, ғаилә именлеге, ил-йортобоҙға тыныслыҡ теләйбеҙ!