Праздник “Картофельный пир”

Башҡортостан Республикаһы байрамы сиктәрендә “Картуф” байрамы гөрләп үтте. Был байрамға Байым биләмәһенең бар ауылдары ла әҙерләнеп, дәртләнеп килгәйне. Байрам беҙҙең “икенсе икмәк” -картуфҡа арналды. Сөнки  беҙҙең өҫтәлдә көн дә тиерлек булған картуф ысынлап та беҙҙе туйҙыра ла, кейендерә лә, мал аҙығы ла булып тора.

Байрамға бөтә ауылдар ҙа ентекле әҙерләнеп килгәндәр. Һәр ауылдың өҫтәле үҙенең исеме менән, картуфтан бешерелгән бик күп төрлө аш-һыу менән һығылып тора ине! Баһалама ағзаларына һәр өҫтәлде ҡарап сығыу үҙе бер ҙур байрам булды – һығылып торған һый-ниғмәттән күҙҙәр ҡамашты!

Байрамды ойошторорға ҡатын-ҡыҙҙар советы рәйесәһе Гөлсинә Әғзәмова, ветерандар советы рәйесе Хәйҙәр Хөснуллин, Мәҙинә Ғәскәрова һәм Байым биләмәһе башлығы Даян Зәбир улы Фәтхуллин һәм мәҙәниәт йорто хеҙмәткәрҙәре бик күп көс һалды. Байрамдың почетлы ҡунағы Башҡортостан Республикаһы Дәүләт Йыйылышы-Ҡоролтай депутаты Йәлил Насиб улы Зәйтүнов ҡатнашыусыларҙы тәбрикләп һәр саҡ шулай берҙәм, әүҙем булырға саҡырҙы.

Бер ауыл да бүләкһеҙ ҡалманы. Ҡатнашыусылар бер-береһе менән аралашып, онотолған рецепттар менән бүлешеп, аш-һыу төрҙәренең нескәлектәрен төшөнөп, үҙебеҙҙең яратҡан көйҙәр аҫтында бейеп тә алдылар.

Ил-йортобоҙға тыныслыҡ, уңышлы йылдар килһен тигән теләктә таралышты ҡатнашыусылар.